OpenAI sets foot in India: భారతదేశం ప్రస్తుతం ప్రపంచంలోనే అతిపెద్ద ఇంటర్నెట్ వినియోగదారుల దేశంగా ఎదిగింది. వేగంగా పెరుగుతున్న డిజిటల్ శక్తిని దృష్టిలో ఉంచుకుని, ChatGPTని రూపొందించిన OpenAI సంస్థ న్యూఢిల్లీ లో తన తొలి ఇండియా ఆఫీస్‌ను ప్రారంభించేందుకు సిద్ధమవుతోంది. మైక్రోసాఫ్ట్ మద్దతుతో నడుస్తున్న ఈ అమెరికన్ కంపెనీ, ఈ ఏడాదిలోపే భారత రాజధానిలో ఆఫీస్‌ను ప్రారంభించనున్నట్లు అధికారికంగా ప్రకటించింది.

OpenAI sets foot in India

ఇప్పటికే OpenAI భారతదేశంలో లీగల్‌గా కంపెనీగా రిజిస్టర్ అయింది. స్థానిక ఉద్యోగులను నియమించుకునే ప్రక్రియ కూడా ప్రారంభమైందని సంస్థ ఒక ప్రకటనలో స్పష్టంచేసింది. ప్రస్తుతం భారతదేశం ChatGPTకి రెండవ అతిపెద్ద మార్కెట్‌గా ఉంది. దాదాపు 100 కోట్లకు పైగా ఇంటర్నెట్ వినియోగదారులు ఉండటంతో, OpenAI ప్రత్యేక ప్రణాళికతో ముందుకు సాగుతోంది. తాజాగా భారత్ కోసం ప్రత్యేకంగా రూ.383 (సుమారు \$4.60) మాత్రమే ఖర్చయ్యే చవకైన నెలవారీ ప్లాన్‌ను కూడా ప్రవేశపెట్టింది.

అయితే, భారత్‌లో ఆఫీస్ కార్యకలాపాలు ప్రారంభించబోతున్న OpenAIకి కొన్ని చట్టపరమైన సవాళ్లు ఎదురవుతున్నాయి. పత్రికలు, పబ్లిషర్లు తమ కథనాలు, కంటెంట్‌ను అనుమతి లేకుండా ట్రైనింగ్ కోసం వాడుతున్నారని ఆరోపణలు వస్తుండగా, OpenAI మాత్రం ఈ ఆరోపణలను ఖండించింది. తాము కేవలం లైసెన్స్ పొందిన పబ్లిక్ డేటాను మాత్రమే వినియోగిస్తున్నామని స్పష్టం చేసింది.

ఈ నేపథ్యంలో OpenAI CEO సామ్ ఆల్ట్‌మన్ కీలక సందేశం ఇచ్చారు. *“AI for India, with India”* అనే నినాదంతో భారత్‌లో ఆఫీస్ ప్రారంభించడం తమకు ఒక ప్రధాన అడుగని ఆయన పేర్కొన్నారు. ఆధునిక AI పరిజ్ఞానాన్ని భారతీయులకు మరింత సులభంగా అందుబాటులోకి తేవడమే కాకుండా, దేశీయ అవసరాలకు అనుగుణంగా ఉండే AI టెక్నాలజీని భారత్‌లోనే అభివృద్ధి చేయడం తమ ప్రధాన లక్ష్యమని ఆయన వివరించారు.

ఆల్ట్‌మన్ ప్రకారం, భారత మార్కెట్ OpenAIకి అత్యంత ప్రాధాన్యం కలిగినది. విస్తృతమైన ఇంటర్నెట్ వినియోగదారుల ఆధారాన్ని దృష్టిలో పెట్టుకుని, స్థానిక ప్రతిభను వినియోగించుకోవడంతో పాటు, AI అభివృద్ధిలో భారత్‌ను ఒక ప్రధాన కేంద్రంగా మార్చాలని కంపెనీ లక్ష్యంగా పెట్టుకుంది.

ఇక భారత మార్కెట్‌లో OpenAIకి పోటీ మరింత కఠినంగా మారనుంది. ఇప్పటికే గూగుల్ తన Gemini మోడల్‌తో పాటు, Perplexity AI వంటి ప్లాట్‌ఫార్మ్‌లు ఉచిత ప్లాన్లను అందిస్తూ బలమైన స్థానం సాధించాయి. ముఖ్యంగా విద్యార్థుల విభాగంలో పోటీ ఎక్కువగా ఉంటుందని నిపుణులు అంచనా వేస్తున్నారు.

OpenAI తాజాగా వెల్లడించిన డేటా ప్రకారం, ప్రపంచవ్యాప్తంగా ఉన్న ChatGPT విద్యార్థి యూజర్లలో భారతదేశం అగ్రస్థానంలో నిలిచింది. గత ఏడాదితో పోలిస్తే, వారానికి యాక్టివ్‌గా ChatGPT ఉపయోగిస్తున్న భారత విద్యార్థుల సంఖ్య నాలుగు రెట్లు పెరిగిందని కంపెనీ తెలిపింది. ఇది భారతదేశంలో AI వినియోగం ఎంత వేగంగా పెరుగుతోందో, అలాగే కొత్త టెక్నాలజీలను అంగీకరించడంలో విద్యార్థులు ముందంజలో ఉన్నారనే విషయాన్ని మరోసారి నిరూపిస్తోంది.

Also Read: కొత్త ఉద్యోగాల్లో చేరిన యువతకు గుడ్‌న్యూస్.!

మరిన్ని Latest Updates కోసం ఇప్పుడే మా ఛానల్ ను సబ్స్క్రైబ్ చేసుకోండి V NEWS