Pulivendula ZPTC Bypoll: మాజీ ముఖ్యమంత్రి వైఎస్‌ జగన్‌ ప్రాతినిధ్యం వహిస్తున్న పులివెందుల, ఒంటిమిట్ట మండలాల్లో జెడ్పీటీసీ ఉప ఎన్నికల పోలింగ్ మంగళవారం ప్రారంభమైంది. బ్యాలెట్ పద్ధతిలో జరుగుతున్న ఈ ఎన్నికను వైసీపీ, టీడీపీలు ప్రతిష్టాత్మకంగా తీసుకున్నాయి. ప్రధానంగా వైసీపీ అభ్యర్థి హేమంత్ రెడ్డి, టీడీపీ అభ్యర్థి మారెడ్డి లతారెడ్డి మధ్య పోటీ హోరాహోరీగా మారింది.మొత్తం 10,600 మంది ఓటర్లు తమ ఓటు హక్కును వినియోగించబోతున్నారు.

Pulivendula ZPTC Bypoll - YSRCP MP YS Avinash Reddy Arrest

ఎంపీ అవినాష్‌ రెడ్డి అరెస్టు: పోలింగ్ ప్రారంభానికి ముందు కడప ఎంపీ వైఎస్‌ అవినాష్‌ రెడ్డిని పోలీసులు మంగళవారం ఉదయం అరెస్టు చేశారు. సోమవారం రాత్రి నుంచే ఆయన నివాసాన్ని ముట్టడి చేసిన పోలీసులు, మంగళవారం ఉదయం 6 గంటల సమయంలో అదుపులోకి తీసుకుని కడపకు తరలించారు. పార్టీ కార్యకర్తలను రెచ్చగొట్టే అవకాశం ఉందన్న సమాచారంపై ఈ అరెస్టు జరిగినట్లు తెలుస్తోంది. అరెస్టు సమయంలో అవినాష్‌ రెడ్డి ఈ చర్యను అక్రమమని పేర్కొంటూ తీవ్ర అభ్యంతరం వ్యక్తం చేశారు.

ఇంటి వద్ద ఉద్రిక్తత: అరెస్టు సమయంలో ఎంపీ అవినాష్‌ రెడ్డి, పోలీసులు మధ్య వాగ్వాదం చోటుచేసుకుంది. తనకు జ్వరం ఉందని, ఇంట్లోనే ఉంటానని చెప్పినా పోలీసులు పట్టించుకోలేదని ఆయన ఆరోపించారు. ఈ సమయంలో పార్టీ కార్యకర్తలు, అభిమానులు అక్కడికి చేరుకుని అరెస్టును అడ్డుకునే ప్రయత్నం చేశారు. పోలీసులు వారిని బలవంతంగా వెనక్కు నెట్టడంతో ఇంటి ప్రాంగణంలో ఉద్రిక్తత నెలకొంది.

కట్టుదిట్టమైన భద్రతా ఏర్పాట్లు: ఎన్నికల సందర్భంగా ఎలాంటి అవాంఛనీయ సంఘటనలు జరగకుండా రెండు మండలాల్లో మొత్తం 1,500 మంది పోలీసులను మోహరించారు. వెబ్‌కాస్టింగ్ సదుపాయం, డ్రోన్లు, మొబైల్ సర్వైలెన్స్ వాహనాలు వినియోగించబడుతున్నాయి. వెబ్‌కాస్టింగ్ లేని పోలింగ్ కేంద్రాల్లో మైక్రో ఆబ్జర్వర్లను నియమించారు. అదనంగా, వైసీపీ రాష్ట్ర ప్రధాన కార్యదర్శి సతీష్ రెడ్డి, టీడీపీ ఎమ్మెల్సీ రాంగోపాల్ రెడ్డిలను హౌస్ అరెస్ట్ చేశారు.

కీలకంగా మారిన ఉప ఎన్నిక: ఈ ఉప ఎన్నికలో 11 మంది అభ్యర్థులు బరిలో ఉన్నారు. హేమంత్‌ రెడ్డి (వైసీపీ) - మారెడ్డి లతారెడ్డి (టీడీపీ) మధ్యే ప్రధాన పోటీ నెలకొంది. మాజీ మంత్రి వివేకానందరెడ్డి హత్య కేసులో నిందితుడైన సునీల్‌ యాదవ్ కూడా అభ్యర్థిగా ఉన్నారు. స్థానిక సంస్థల ఎన్నిక కావడంతో, ఈ ఫలితాలు రెండు పార్టీల ప్రతిష్టకే కాకుండా భవిష్యత్ రాజకీయ సమీకరణాలపై కూడా ప్రభావం చూపనున్నాయి. 

Also Read: లిక్కర్ కుంభకోణం వెనుక ఉన్నఈ పాత్రధారి ఎవరు?