Varalakshmi Vratam: హిందూ సంప్రదాయంలో శ్రావణ మాసానికి ప్రత్యేకమైన స్థానం ఉంది. ఈ మాసంలో నిర్వహించే పవిత్రమైన వ్రతాల్లో వరలక్ష్మీ వ్రతం ప్రముఖమైనది. ఈ వ్రతాన్ని ఎందుకు చేయాలి? దాని ప్రాముఖ్యత ఏంటి అనే విషయాల్లో కొందరికి సందేహాలు ఉండవచ్చు. అయితే వరలక్ష్మీ వ్రతాన్ని ఆచరించడం వల్ల కోరిన వరాలు సిద్ధిస్తాయని భక్తుల విశ్వాసం. పురాణ కథనాల ప్రకారం చారుమతి అనే ధర్మపత్నికి కలలో లక్ష్మీదేవి దర్శనమిచ్చి, శ్రావణ మాసంలో పౌర్ణమి కంటే ముందు వచ్చే శుక్రవారం ఈ వ్రతాన్ని చేయాలని సూచించిందని వేద పండితులు వివరిస్తున్నారు.

ఈ వ్రతాన్ని ఎందుకు చేస్తారు..?

వరలక్ష్మీ వ్రతం అనేది హిందూ సంప్రదాయంలో అత్యంత పవిత్రమైన వ్రతాలలో ఒకటి. ఈ వ్రతాన్ని ముఖ్యంగా ఆంధ్రప్రదేశ్‌, తెలంగాణ, తమిళనాడు మరియు కర్ణాటక రాష్ట్రాల్లో విశేషంగా ఆచరిస్తారు. ఇది జూలై-ఆగస్టు మధ్య వచ్చే శ్రావణ మాస శుక్రవారంలో నిర్వహిస్తారు. ఈ వ్రతం వల్ల శ్రీ మహాలక్ష్మి అనుగ్రహం లభిస్తుందని నమ్మకం. ఆమె అష్ట లక్ష్మి రూపాలలో ధన, ధాన్య, విజయ, సంతాన, ధైర్య, విద్యా, వైభవ, శాంతి.. భక్తులను అనుగ్రహిస్తుందని విశ్వాసం. ఈ వ్రతాన్ని భక్తిశ్రద్ధలతో ఆచరిస్తే కుటుంబంలో ఆర్థిక స్థిరత, శాంతి, ఐశ్వర్యం కలుగుతాయని నమ్మకం ఉంది.

పురాణ కథలోని ప్రాముఖ్యత

వివాహిత మహిళలు తమ భర్త ఆయుష్షు, కుటుంబ శ్రేయస్సు కోసం ఈ వ్రతాన్ని నిర్వహిస్తారు. సత్యవతి, అనసూయ వంటి మహాశక్తుల ఆదర్శాలను ప్రతిబింబించేలా ఈ వ్రతం ఉంటుంది. నారీశక్తిని, గృహస్థాశ్రమ విధులను గౌరవించేలా ఈ వ్రతం ఉన్నదని పండితులు చెబుతున్నారు. పురాణాల ప్రకారం చారుమతి అనే సతీధర్మ పత్నికి లక్ష్మీదేవి ప్రత్యక్షమై ఆమె భక్తిని మెచ్చి వరాలిచ్చినట్లు కథనాలు చెబుతున్నాయి. అప్పటి నుండి ఈ వ్రతానికి ప్రాచుర్యం లభించిందని విశ్వసిస్తున్నారు.

Also Read: కైలాస పర్వతంపై నిజంగా శివుడు ఉన్నాడా?

వ్రతంలో కంకణధారణ ప్రత్యేకత

వ్రతానికి ముఖ్యాంశాల్లో కంకణం ఒకటి. వరలక్ష్మీ వ్రతం రోజున మహిళలు కొత్త పట్టు వస్త్రాలు ధరించి, పసుపు, కుంకుమతో అలంకరించుకుని అమ్మవారిని పూజిస్తారు. పూజ అనంతరం ఇతర మహిళలకు తాంబూలాలు ఇచ్చి గౌరవిస్తారు. ఇది మహిళల మధ్య సంబంధాలను బలోపేతం చేస్తుందని పండితులు చెప్పుకొస్తున్నారు. ఉదయం బ్రహ్మ ముహూర్తంలో స్నానం చేసి, పూజ మండపంలో కలశం స్థాపించి, లక్ష్మీదేవిని శ్రద్ధతో పూజిస్తారు. సాధారణంగా కంకణం ఎడమ చేయి కట్టుకుంటారు కానీ ఈ రోజున కుడిచేయి కట్టడం విశేషం.

వ్రత ఫలితం ఏమిటి..?

పురోహితుల ప్రకారం వరలక్ష్మీ వ్రతం అనేది అత్యంత భక్తిశ్రద్ధలతో నిర్వహించాల్సిన పుణ్యకార్యం. ఇది సంపద, ఆరోగ్యం, సంతానం, శాంతి, శ్రేయస్సు కలిగించే పవిత్రమైన వ్రతంగా భావించబడుతుంది. అందుకే వివిధ రాష్ట్రాల్లో లక్షలాది మంది మహిళలు ఈ వ్రతాన్ని ఘనంగా జరుపుకుంటున్నారు. లక్ష్మీదేవి అనుగ్రహాన్ని పొందే ఈ శుభవేళలో పూజలు చేయడం వల్ల కుటుంబం మొత్తం శాంతిమయంగా, సౌభాగ్యంతో ఉండుతుందని విశ్వసించబడుతుంది.

Also Read: అష్టదిక్పాలకులు అంటే ఎవరు?

మరిన్ని Latest Updates కోసం ఇప్పుడే మా ఛానల్ ను సబ్స్క్రైబ్ చేసుకోండి V NEWS