Dharmendra Hema Malini Relationship: బాలీవుడ్ దిగ్గజ నటుడు ధర్మేంద్ర (89) ఇటీవల కన్నుమూసిన నేపథ్యంలో, ఆయన వ్యక్తిగత జీవితం ప్రత్యేకంగా నటి హేమమాలినితో జరిగిన రెండో పెళ్లి అప్పట్లో సంచలనంగా మారింది. ఆరు దశాబ్దాల సినీ ప్రయాణంలో అనేక మైలురాయిలు సాధించిన ధర్మేంద్ర జీవితంలో, ఈ ప్రేమకథ ఎప్పటికీ చర్చనీయాంశంగానే నిలిచిపోయింది.
 |
| Dharmendra Hema Malini Relationship |
కేవలం 19 ఏళ్ల వయసులోనే ధర్మేంద్ర ప్రకాశ్ కౌర్ను వివాహం చేసుకున్నారు. వారికి ఇద్దరు కుమారులు సన్నీ డియోల్, బాబీ డియోల్ తో పాటు ఇద్దరు కుమార్తెలు ఉన్నారు. కుటుంబ జీవితం సజావుగానే సాగుతున్నప్పటికీ, ఆయన సినీ రంగ ప్రవేశంతో ఎన్నో మార్పులు చోటుచేసుకున్నాయి.
1970 దశకంలో హేమమాలినితో వరుస సినిమాలు చేస్తున్న సమయంలో వీరిద్దరి మధ్య ప్రేమ మొలకెత్తింది. ముఖ్యంగా షోలే షూటింగ్ సమయంలో వారి మధ్య కెమిస్ట్రీ మరింత బలపడింది. ఒక సన్నివేశంలో హేమను కౌగిలించుకునే సీన్ కోసం ధర్మేంద్ర లైట్బాయ్స్కు రూ.2000 టిప్స్ ఇచ్చి టేకులు పెంచుకునేవారని అప్పటి వార్తలు చెబుతున్నాయి. ఈ రూమర్ ఆ రోజుల్లో మీడియాలో పెద్ద చర్చకు దారితీసింది.
హేమమాలినితో వివాహం చేసుకోవడానికి ధర్మేంద్ర సిద్ధమైనప్పటికీ, ఆయన మొదటి భార్య ప్రకాశ్ కౌర్ దీనికి అంగీకరించలేదు. విడాకులు ఇవ్వడానికి నిరాకరించడంతో, హిందూ వివాహ చట్టం ప్రకారం రెండో పెళ్లి సాధ్యం కాకపోయింది. దీంతో ధర్మేంద్ర ఓ ధైర్య నిర్ణయం తీసుకున్నారు. ఇస్లాం మతం స్వీకరించి దిలావర్ ఖాన్ పేరుతో 1980లో హేమమాలినిని వివాహం చేసుకున్నారని అప్పటి మీడియా కథనాలు వెల్లడించాయి. అంతేకాక, హేమమాలిని కోరిక మేరకు సంప్రదాయ అయ్యంగార్ పద్ధతిలో కూడా వివాహం జరిగినట్లు అనేక నివేదికలు పేర్కొంటాయి.
ఈ వివాహం ధర్మేంద్ర తొలి కుటుంబంలో కలతలకు దారితీసింది. ముఖ్యంగా కుమారులు సన్నీ డియోల్, బాబీ డియోల్లతో ఆయన సంబంధాలపై ప్రభావం పడింది. అయినప్పటికీ, మొదటి భార్య ప్రకాశ్ కౌర్ ఎప్పుడూ ఆయనను పబ్లిక్గా తప్పుబట్టలేదు. ఒక ఇంటర్వ్యూలో ఆమె, “ఆయన మంచి తండ్రే… కానీ ఒక భార్యగా నా బాధను ఎవరూ అర్థం చేసుకోలేరు” అని చెప్పడంతో, అప్పట్లో అది దేశవ్యాప్తంగా పెద్ద చర్చనీయాంశమైంది.