Vice President Elections 2025: ఉపరాష్ట్రపతి ఎన్నికలు ఈరోజు (మంగళవారం) జరగనున్నాయి. ఉదయం 10 గంటలకు ఓటింగ్ ప్రారంభమై సాయంత్రం 5 గంటల వరకు కొనసాగుతుంది. ఆ తరువాత సాయంత్రం 6 గంటల నుంచి ఓట్ల లెక్కింపు మొదలవుతుంది. ఇదే రోజు రాత్రికి ఫలితాలు ప్రకటించబడతాయి. ఎన్డీఏ తరఫున సి.పి. రాధాకృష్ణన్ పోటీ చేస్తున్నారు, ఇక ఇండియా కూటమి అభ్యర్థిగా సుప్రీంకోర్టు మాజీ న్యాయమూర్తి బి. సుదర్శన్ రెడ్డి నామినేట్ అయ్యారు.

Vice President Elections 2025

ఈ ఎన్నికల్లో లోక్‌సభ, రాజ్యసభ సభ్యులే ఓటు వేసే అర్హత కలిగినవారు. రాజ్యసభలోని నామినేటెడ్ ఎంపీలు కూడా ఓటు వేయగలరు. ఈ ఎన్నికల్లో విప్ జారీ చేయబడదు, రహస్య ఓటింగ్ పద్ధతిలోనే ఓటు వేయాలి.

ఎంపీలకు స్వేచ్ఛ ఉన్నా, ఎక్కువగా పార్టీ లైన్‌ ప్రకారమే ఓటు వేయడం సాంప్రదాయం. అయితే, గతంలో క్రాస్ ఓటింగ్ జరిగిన సందర్భాలు ఉన్నాయి. ఈసారి కూడా అలాంటి అవకాశం లేకపోలేదు. ప్రస్తుతం రాజ్యసభలో 239 మంది, లోక్‌సభలో 542 మంది సభ్యులు ఉన్నారు. విజయం సాధించడానికి కనీసం 391 ఓట్లు అవసరం. ఎన్డీఏ శ్రేణుల్లో ఇప్పటికే 425 మంది ఎంపీలు ఉన్నారు. అదనంగా కొన్ని ఇతర పార్టీల మద్దతు కూడా వస్తుందని భావిస్తున్నారు.

వైఎస్ఆర్ కాంగ్రెస్ పార్టీ ఇప్పటికే ఎన్డీఏకు మద్దతు ఇస్తామని ప్రకటించింది. ఆ పార్టీకి రాజ్యసభలో 7 మంది, లోక్‌సభలో 4 మంది సభ్యులు ఉన్నారు. దీని వలన ఎన్డీఏకు మొత్తం 436 మంది ఎంపీల మద్దతు లభించనుంది. ఇదే సమయంలో, ఆమ్ ఆద్మీ పార్టీకి చెందిన స్వాతి మలివాల్ కూడా ఎన్డీఏ అభ్యర్థికి అనుకూలంగా ఓటేయవచ్చని బీజేపీ నమ్ముతోంది.

Also Read: జాతీయ రాజకీయాల దృష్టిని ఆకర్షిస్తున్న ఉపరాష్ట్రపతి ఎన్నికలు!

ఇక బీఆర్ఎస్, బీజేడీ తమ వైఖరిని ఇంకా స్పష్టంగా చెప్పలేదు. బీఆర్ఎస్ ఓటింగ్‌కి గైర్హాజరయ్యే అవకాశముంది. బీజేడీ మాత్రం ఎన్డీఏకు మద్దతు ఇవ్వవచ్చని అంచనా. బీజేడీ అధినేత నవీన్ పట్నాయక్ ప్రస్తుతం ఢిల్లీలో ఉన్నారు, మద్దతు అంశంపై ఆయనతో చర్చలు జరుగుతాయి.

బీఆర్ఎస్‌కు రాజ్యసభలో 4 మంది సభ్యులు ఉండగా, బీజేడీకి 7 మంది సభ్యులు ఉన్నారు. అలాగే లోక్‌సభలో 7 మంది స్వతంత్ర ఎంపీలు ఉన్నారు. వీరిలో ముగ్గురి ఓటు దిశ ఇంకా తెలియలేదు. అదేవిధంగా అకాలీదళ్, జెడ్‌పీఎం, వీఓటీటీపీ నుండి ఒక్కొక్క సభ్యుడు ఉన్నారు. వీరు ఎవరికి అనుకూలంగా ఓటేస్తారన్నది ఇంకా స్పష్టత రాలేదు.

ప్రస్తుతం ప్రతిపక్షానికి 324 ఓట్లు ఉన్నట్లు లెక్క. ఈ పరిస్థితిలో విజయ తేడా 100 నుంచి 125 ఓట్ల మధ్య ఉండే అవకాశం ఉంది.

గత ఎన్నికల్లో (2022లో) జగదీప్ ధంఖర్, ప్రతిపక్ష అభ్యర్థి మార్గరెట్ అల్వాను 346 ఓట్ల తేడాతో ఓడించారు. అయితే ఈసారి అంత పెద్ద తేడా ఉండదని భావిస్తున్నారు. ఎందుకంటే ప్రతిపక్షం గతంతో పోలిస్తే ఇప్పుడు మరింత బలంగా ఉంది. రాజ్యసభలో ప్రతిపక్ష అభ్యర్థికి సుమారు 150 ఓట్లు వ్యతిరేకంగా, 90 కంటే తక్కువ అనుకూల ఓట్లు వస్తాయని ఎన్డీఏ వర్గాలు అంచనా వేస్తున్నాయి. అలాగే లోక్‌సభలో కూడా కొంతమంది ప్రతిపక్ష ఎంపీలు తమవైపు వచ్చేలా ప్రయత్నాలు జరుగుతున్నాయి.

ఈ ఎన్నికల్లో ఒక్క ఓటు కూడా రద్దు కాకుండా ఉండేలా, ఎన్డీఏ-ఇండియా కూటమి రెండూ తమ ఎంపీలకు ముందుగానే ప్రత్యేక సూచనలు ఇచ్చి శిక్షణ కల్పించాయి.

Also Read: రాష్ట్రపతి గా నరేంద్ర మోడీ! కాబోయే ప్రధాన మంత్రి ఎవరో తెలుసా? 

మరిన్ని Latest Updates కోసం ఇప్పుడే మా ఛానల్ ను సబ్స్క్రైబ్ చేసుకోండి V NEWS