Trump-Putin Alaska Summit: అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్‌ల మధ్య జరగబోయే కీలక భేటీకి అలస్కాలోని యాంకరేజ్ నగరం వేదికగా మారింది. కేవలం వారం రోజుల ముందే ఈ సమావేశం ఖరారవ్వడంతో, అమెరికా అధికారులు వేగంగా ఏర్పాట్లలో నిమగ్నమయ్యారు. వందలాది సీక్రెట్ సర్వీస్ ఏజెంట్లు, భద్రతా సిబ్బంది మోహరించడంతో యాంకరేజ్ ఒక శత్రు దుర్భేద్య కోటలా మారిపోయింది.

Trump-Putin Alaska Summit

ప్రస్తుతం అలస్కాలో పర్యాటక సీజన్ కొనసాగుతుండటంతో, ఈ ఏర్పాట్లు మరింత క్లిష్టమయ్యాయి. నగరంలోని హోటళ్లన్నీ నిండిపోవడం, అద్దె వాహనాల కొరత ఏర్పడడంతో, ఇతర రాష్ట్రాల నుంచి ప్రత్యేక వాహనాలు, కమ్యూనికేషన్ పరికరాలు, వైద్య సామగ్రి కార్గో విమానాల ద్వారా తరలిస్తున్నారు.

ఈ శిఖరాగ్ర భేటీ "జాయింట్ బేస్ ఎల్మెన్‌డార్ఫ్-రిచర్డ్‌సన్" అనే సైనిక స్థావరంలో జరుగనుంది. పటిష్ట భద్రత, నియంత్రిత గగనతలం, ప్రజల ప్రవేశం లేకపోవడం వంటి అంశాలు భద్రతాపరంగా అనుకూలంగా ఉన్నాయని అధికారులు చెబుతున్నారు. అలస్కా గవర్నర్ మైక్ డన్లీవీ ప్రకారం, పర్యాటక సీజన్‌లో హోటళ్లు, వాహనాల కొరత ఉన్నా సైనిక స్థావరంలో సమావేశం నిర్వహించడం వల్ల అనేక సమస్యలు పరిష్కారమయ్యాయి.

Also Read: అమెరికా-భారత్‌ వ్యాపార సంబంధాలలో కొత్త ఉద్రిక్తతలు!

భద్రతా ఏర్పాట్లు అత్యంత కఠినంగా ఉండనున్నాయి. ఇద్దరు నేతలకు వారి వారి దేశ భద్రతా సిబ్బందే రక్షణగా ఉండి, వాహనాలు, తలుపులు, కదలికల్లో కూడా పరస్పర సమానత్వం పాటించనున్నారు. ప్రతి అమెరికన్ ఏజెంట్‌కు ఎదురుగా ఒక రష్యన్ ఏజెంట్ ఉండేలా భద్రతా సమీకరణలు సెట్ చేస్తున్నారు.

సమావేశం ఏర్పాట్లు ఎంత వేగంగా జరిగాయంటే, యాంకరేజ్‌లోని ఒక రియల్టర్‌కు మొదట అమెరికా సీక్రెట్ సర్వీస్ నుంచి, ఆపై న్యూయార్క్ రష్యా కాన్సులేట్ నుంచి ఇళ్ల కోసం కాల్స్ రావడం జరిగింది. ఈ సమావేశం ఉక్రెయిన్ యుద్ధాన్ని ముగించే దిశగా, భూభాగాల మార్పిడి వంటి సున్నితమైన అంశాలపై చర్చ జరగవచ్చని ట్రంప్ పేర్కొన్నారు. మరోవైపు, పుతిన్ ఈ భేటీ ద్వారా ట్రంప్‌తో సంబంధాలను బలోపేతం చేసుకోవాలని ప్రయత్నిస్తున్నారు.

Also Read: అమెరికా ఒత్తిడికి భారత్‌ ఇచ్చిన చరిత్రాత్మక సమాధానాలు!