Guru Purnima 2025: హిందూ పంచాంగం ప్రకారం ప్రతి ఏటా ఆషాఢ మాసంలో శుక్ల పక్షంలో వచ్చే పౌర్ణమిని గురు పౌర్ణమి లేదా ఆషాఢ పూర్ణిమగా పిలుస్తారు. ఈరోజును మహాభారతాన్ని రచించిన వేదవ్యాసుడి జన్మదినంగా భావిస్తారు. పురాణాల ప్రకారం, భూమిపై ఉన్న మనుషులందరికీ జ్ఞానాన్ని ప్రసాదించినందున, ఆయనను గురువుగా పరిగణిస్తారు. ఈ నేపథ్యంలో ఆయన జన్మదినాన్ని "గురు పూర్ణిమ"గా జరుపుకుంటారు. ఈ రోజున గురువులతో పాటు వేదవ్యాస మహర్షికి ప్రత్యేక పూజలు నిర్వహిస్తారు. గురువుల ఆశీర్వాదంతో శుభ ఫలితాలు కలుగుతాయని ప్రజలు విశ్వసిస్తారు. జ్యోతిష్యశాస్త్రం ప్రకారం, జాతకంలో గురుస్థానం బలహీనంగా ఉన్నవారు ఈరోజు గురుపూజ నిర్వహిస్తే అనేక లాభాలు కలుగుతాయని నమ్మకం ఉంది.
గురుపూర్ణిమ: వ్యాసుడి కే ఎందుకు ప్రత్యేకత?
భారతీయ సంస్కృతిలో తల్లిదండ్రుల తర్వాత గౌరవనీయ స్థానం గురువుకే చెందుతుంది. అందువల్ల గురు పూర్ణిమను ఒక పవిత్ర దినంగా భావించి గురువులను ఆరాధిస్తారు. ఈ ఆరాధన వల్ల కష్టాల నుంచి విముక్తి, విజయం, ఉన్నత స్థానాలు కలుగుతాయని నమ్మకం. గురువులు మన సామర్థ్యాన్ని గుర్తించి, జ్ఞాన జ్యోతిని వెలిగించి జీవితంలో ముందుకు నడిపించేవారు.
“గు” అంటే అజ్ఞానం - “రు” అంటే తొలగించేవారు
గురువు అనే పదంలో "గు" అర్థం అజ్ఞానం, "రు" అర్థం తొలగించేవాడు. అందువల్ల గురువు అంటే అజ్ఞానాన్ని తొలగించే వ్యక్తి. వేదాలను నాలుగు భాగాలుగా విభజించి, సామాన్యులకు అర్థమయ్యేలా వేదవాక్యాలను అందించిన వ్యాసుడు చేసిన కృషి ఎంతో విశేషం. మహాభారతాన్ని, పంచమ వేదంగా చెప్పబడే గ్రంథాన్ని రచించిన ఆయన పుట్టినరోజే ఈ గురు పూర్ణిమ. అందుకే ఈ దినాన్ని "వ్యాస పూర్ణిమ" అని కూడా పిలుస్తారు.
గురుపూజతో జ్ఞానానికి ద్వారాలు
ఈ పవిత్ర దినాన గురువుల అనుగ్రహం కోరుకునే వారు ధర్మ కార్యక్రమాలు, ఆధ్యాత్మిక చింతన, జపాలు, హోమాలు నిర్వహించి గురుబలాన్ని పెంపొందించుకోవచ్చు. గురు గ్రహ అనుగ్రహాన్ని పొందాలంటే వేదాలు, పురాణాలు, శాస్త్రాలలో చెప్పిన విధంగా గురువు పట్ల భక్తిని కలిగి ఉండాలి.
శుభఫలితాల కోసం శాంతియుత పూజా విధానాలు
గురు పూర్ణిమ రోజున దక్షిణామూర్తి, దత్తాత్రేయ స్వామిని ఆరాధించడం ఎంతో శ్రేయస్కరం. "శ్రీ హయగ్రీవాయ నమః" అనే మంత్రాన్ని విద్యార్థులు నిరంతరం జపించడం మంచిదిగా భావిస్తారు. ఇదే రోజున వేద విద్యను బ్రహ్మదేవుడు తన కుమారుడైన వశిష్ట మహర్షికి, ఆయన తన కుమారుడైన శక్తి మహర్షికి, తదనంతరం పరాశర మహర్షికి, చివరికి వ్యాస మహర్షికి ఉపదేశించిన ఘట్టాన్ని పురాణాలు పేర్కొంటాయి.
ప్రత్యేక పూజలు - ఆచారాలకు ప్రాముఖ్యత
ఈ రోజు నూతన వస్త్రాలను ధరించడం, వాటిపై నిమ్మకాయలు, బియ్యం ఉంచడం ఒక శుభచిహ్నంగా పరిగణించబడుతుంది. పూజ అనంతరం ఆ బియ్యాన్ని ఇంటికి తీసుకెళ్లి బియ్యం డబ్బాలో కలిపితే ధనప్రాప్తి జరుగుతుందని పెద్దలు అంటారు. నిమ్మకాయలు కార్యసిద్ధిని సూచిస్తాయని విశ్వాసం. దక్షిణ భారతదేశంలో వ్యాస పూర్ణిమ రోజున ఆదిశక్తికి ప్రత్యేక పూజలు నిర్వహిస్తారు. తెలుగు రాష్ట్రాల్లో షిరిడీ సాయిబాబా ఆలయాల్లో మూడు రోజుల పాటు విశేష పూజలు నిర్వహిస్తారు.
గురు పూర్ణిమలో విశ్వాసం, ఆరాధన - మన జీవితాన్ని మార్చగల సాధనం
ఈ దినం గురువుల పట్ల కృతజ్ఞతను తెలుపుకునే అవకాశం మాత్రమే కాదు… ఒక ఆత్మబోధ, ఆత్మచింతనకు దారితీసే మార్గం. జ్ఞానోదయం కావాలనుకునే ప్రతీ మనిషికీ గురు పూర్ణిమ ఒక ప్రత్యేక దినం.
Also Read: బోనాలు అంటే ఏంటి? బోనాల 8 ఘట్టాల ప్రత్యేకతలు తెలుసా.!
మరిన్ని Interesting Facts కొరకు మా ఛానల్ ను ఫాలో అవ్వండి V NEWS