Dr BV Pattabhiram Hypnotist: డాక్టర్ బి.వి. పట్టాభిరామ్ గారు ఒక మానసిక వైద్యుడు మాత్రమే కాదు, వ్యక్తిత్వ వికాసాన్ని ప్రజల్లో నాటేందుకు జీవితాన్ని అంకితం చేసిన మార్గదర్శకుడు. చిన్నప్పటి నుంచే చురుకైన ఆలోచనలతో, ఎదుటి వాళ్లలో ధైర్యం నింపే శక్తితో ఎదిగారు. మానసిక ఆరోగ్యం, ఆత్మవిశ్వాసం, ధ్యానం వంటి అంశాలపై సామాన్యులకు సులభంగా అర్థమయ్యే భాషలో బోధన చేశారు.
Osmania యూనివర్సిటీ నుండి మానసిక శాస్త్రం, తత్త్వశాస్త్రంలో పోస్ట్ గ్రాడ్యుయేట్ అయిన పట్టాభిరామ్ గారు, "Yoga and Hypnotism - A Pragmatic Approach" అనే అంశంపై పీహెచ్‌డీ చేశారు. అమెరికాలోని యూనివర్సిటీ ఆఫ్ ఫ్లోరిడా నుంచి హిప్నోటిజంలో గౌరవ డాక్టరేట్ కూడా పొందారు. ఆయన విద్యా లోతు, ఆచరణ దృక్పథం వల్లే సామాన్యుల జీవనశైలిలో మార్పు తీసుకురాగలిగారు.
ఇంద్రజాలకుడిగా (మెజీషియన్) గా దేశవ్యాప్తంగా గుర్తింపు పొందిన పట్టాభిరామ్ గారు, హిప్నోటిజాన్ని మానసిక శక్తి పెంపుదలకు వినియోగించే విధానాన్ని పరిచయం చేశారు. టీవీ, స్టేజి ప్రోగ్రామ్‌లలో కనిపించే ఆయన ప్రదర్శనలు మంత్ర ముగ్ధులను చేసేవి. అయితే వీటిని వినోదంగా మాత్రమే కాకుండా, వ్యక్తిత్వ శిక్షణ, సమస్యల పరిష్కారానికి దోహదం చేసే విధంగా ఉపయోగించారు.
1991లో ఆయన స్థాపించిన ప్రశాంతి కౌన్సిలింగ్ అండ్ హెచ్ఆర్డీ సెంటర్ ద్వారా వేల మంది విద్యార్థులు, ఉద్యోగులు, మహిళలు లాభపడిన వారు ఉన్నారు. ఆత్మవిశ్వాసం, లక్ష్య నిర్దేశనం, ఫోకస్ పెంపు వంటి అంశాలపై శిక్షణలు ఇచ్చారు. విద్యార్థుల నుంచి ఐఏఎస్ అభ్యర్థులు వరకు ఎన్నో తరగతులు నిర్వహించారు.
Also Read: ప్రపంచ యుద్ధ చరిత్రను మార్చిన భారతీయుడు
పట్టాభిరామ్ గారు సుమారు 57 పుస్తకాలు రాశారు. “Mind Magic”, “Positive Thinking”, “Genius” వంటి రచనలు ఎంతో ప్రజాదరణ పొందాయి. వీటిలో హిప్నోటిజం, ధ్యానం, ఆత్మవిశ్వాసం, పిల్లల ఎదుగుదల వంటి అంశాలపై చక్కటి అవగాహనను అందించారు. పుస్తక రూపంలో ఆయా విషయాలను నేర్చుకోవాలనుకునే వారికి ఇవి అమూల్యమైన మార్గదర్శకాలు.
అమెరికాలోని నాష్విల్లే, న్యూ ఓర్లియన్స్ నగరాల నుండి హానరరీ సిటిజన్‌గా గౌరవించబడ్డారు. స్వీడన్, థాయిలాండ్, ఆస్ట్రేలియా, సింగపూర్ లాంటి దేశాల్లో వ్యక్తిత్వ వికాసంపై వర్క్‌షాపులు నిర్వహించారు.
2025 సోమవారం (జూన్ 30) రాత్రి 9.45 గంటలకు గుండెపోటుతో తుది శ్వాస విడిచారు. కానీ ఆయన ఆలోచనలు, రచనలు, శిక్షణలు ప్రజలలో జీవిస్తున్నాయి. ఆయన్ని అనుసరించిన శిష్యులు, అభిమానులు ఆయన నెరవేర్చిన స్ఫూర్తిని ముందుకు తీసుకెళ్తున్నారు. బి.వి. పట్టాభిరామ్ గారి జీవితం మనందరికీ ఒక ప్రేరణగా నిలుస్తుంది మన ఆత్మవిశ్వాసం, ధైర్యాన్ని నమ్ముకుని ముందుకు సాగాలని చెబుతుంది.
Also Read: దేశ భద్రత కోసం తన జీవితం త్యాగం చేసిన భారతీయ గూఢచారి
మరిన్ని Latest Updates కోసం ఇప్పుడే మా ఛానల్ ను సబ్స్క్రైబ్ చేసుకోండి V NEWS